మా తరం--మారిన తరం 

పట్టు పంచె బోయె కట్టు పంచెయు బోయె 

కడకు జీన్సులు వచ్చె కాల మహిమ 

అడ్డ పంచెయు బోయె అంగవస్త్రము బోయె 

కడకు చెడ్డీ లొచ్చె కాల మహిమ 

నుదుట బొట్టులు బోయె నునుపు గడ్డము బోయె 

కడకు దాడీ వచ్చె కాల మహిమ 

పొడుగు లాల్చీ పోయె పొట్టి చొక్కా పోయె 

కడకు టీషర్ట్లొచ్చె కాల మహిమ 

పైకి జూతము కండల పెంపు మహిమ 

గాంచ దేహములోన రోగాల మహిమ 

ఆంగికమ్మును గమనింప ఆంగ్ల మహిమ 

కనేద మిటు యువకుల కలికాల మహిమ 

*******************************

నాగరీకము హెచ్చి నాతి బొట్టును చెరిపె 

చేతి గాజులు జూడ చేయి జారె 

చెదలు వదలదాయె చీరలు జాకెట్లు 

పేంట్లు  షర్ట్లు అమిత ఫేషనాయె 

తలకు కత్తెర వేయు తలపు మోజై పోయె 

జుట్టు జడలు పోయి జూలు వచ్చె 

ఇంగిలీసు దొరల ఎంగిలి పీసులు 

నోట లేక పలుకు దాటదాయె 

కృత్రిమత యన్న రాకాసి కృచ్ఛమైన

కోరలకు మన సంస్కృతి క్రుయ్య జేసి 

తల్లడిలుచుంటి మిట్టుల తలలు బట్టి 

దేవుడెటు లొచ్చికాచునో తెలియ లేక 

*********************************