శారదా భుజంగ ప్రయాతాష్టకం

శారదా భుజంగ ప్రయాతాష్టకం 






సువక్షోజకుంభాం సుధాపూర్ణకుంభాం


ప్రసాదావలంబాం ప్రపుణ్యావలంబాం


సదాస్యేందుబింబాం సదానోష్ఠబింబాం


భజే శారదాంబామజస్రం మదంబాం 1




కటాక్షే దయార్ద్రాం కరే జ్ఞానముద్రాం


కలాభిర్వినిద్రాం కలాపైః సుభద్రామ్


పురస్త్రీం వినిద్రాం పురస్తుంగభద్రాం


భజే శారదాంబామజస్రం మదంబాం 2




లలామాంక ఫాలాం లసద్గానలోలాం


స్వభక్తైకపాలాం యశఃశ్రీ కపోలామ్


కరే త్వక్షమాలాం కనత్ప్రత్నలోలాం


భజే శారదాంబామజస్రం మదంబాం 3




సుసీమంత వేణీం దృశా నిర్జితైణీం


రమత్కీరవాణీం నమద్వజ్రపాణీమ్


సుధామంధరాస్యాం ముదాచింత్యవేణీం


భజే శారదాంబామజస్రం మదంబాం 4




సుశాంతాం సుదేహాం దృగంతే కచాంతాం


లసత్సల్లతాంగీమనంతామచింత్యామ్


స్మృతాం తాపసైః సర్గ పూర్వ స్థితాం తాం


భజే శారదాంబామజస్రం మదంబాం 5




కురంగే తురంగే మృగేంద్రే ఖగేంద్రే


మరాలే మదేభే మహోక్షేధిరూఢామ్


మహత్యాం నవమ్యాం సదా సామరూపాం


భజే శారదాంబామజస్రం మదంబాం 6




జ్వలత్కాంతి వహ్నిం జగన్మోహనాంగీం


భజే మానసాంభోజ సుభ్రాంత భృంగీం


నిజ స్తోత్ర సంగీత నృత్య ప్రభాంగీం


భజే శారదాంబామజస్రం మదంబాం 7




భవాంభోజ నేత్రాజ సంపూజ్యమానాం


లసన్మందహాస ప్రభావక్త్ర చిహ్నామ్


చలచ్చంచలా చారుతాటంక కర్ణాం


భజే శారదాంబామజస్రం మదంబాం 8

ఇతి శ్రీమత్పరమహంసపరివ్రాజకాచార్యస్య శ్రీగోవింద భగవత్పూజ్యపాద శిష్యస్య 

శ్రీమచ్చంకరభగవతః కృతౌ 

శారదాభుజంగ ప్రయాతాష్టకమ్