ఇది రాళ్ళబండి వారి కవితా ప్రసాదము

 

ఇది రాళ్ళబండి వారి కవితా ప్రసాదము . ఆస్వాదించండి ఆనందించండి.

వచన కవితలు కూడా అలతి పదాలతో ఎంత భావస్ఫోరకముగా వ్రాయవచ్చునో ఆలోచించండి. మీ కవితలతో తెలుగునకు వెలుగులు నింపండి. భావముంటే చాలదు. తగిన భాష కావాలి. ఇటువంటి ప్రముఖుల రచనలు చదివితే ఎట్లు వ్రాయాలన్న విషయం మీకర్థమౌతుంది.

 

శీర్షిక : ఒంటరి  జంట

                        రచన: డా.రాళ్ళబండి కవితాప్రసాద్

                                    ......  ....... ........

విరిగిన  రెక్కల పక్షులు రెండు 

ఒంటరిగా కుర్చుని మాట్లాడుకుంటున్నాయి,

ఎగిరొచ్చిన ఆకాశం గురించి ,

తాక లేక తిరిగొచ్చిన తారల గురించి....

గూళ్ళు చెదిరిన జ్ఞాపకాలు ,

గుడ్లు పగిలిన జ్ఞాపకాలు,

ఏకాంతంగా గడిపిన వర్షం 

ఒంటరిగా ఎదుర్కొన్న తుపాన్లు ....

రాలిపోయిన ఈకల గురుంచి

ఎగిరిపోయిన కాలం గురించి,

గొంతు పెగలక కళ్ళతో 

మాట్లాడుకుంటున్నాయి ......

శిఖరాగ్ర వృక్షం పై కూర్చుని లోయను  చూసినప్పుడు ,

లోయలో  వాలి కొండకొనకేసి జాలిగా ఏటవాలుగా ఎగిరినప్పుడు ,

గూటిలోని పసిపిట్ట  గొంతులోచిరుగింజని గుటకేయించి నప్పుడు ,

రెక్క రాలిపడేలావేటగాడి బాణం  గుచ్చుకున్నప్పుడు ,

ఏం  జరిగిందో నిశ్సబ్దంగా  మాట్లాడుకుంటున్నాయి ......

ఇప్పుడు  ఎగిరే వీలు లేదు

పాడే  అవసరం  లేదు.....

కానీ ,

ఎగరాల్సిన దూరం  ఇంకా  ఉంది  ....

పాట సగం లో  ఆగింది ....

(4.30 am.14-2-2014)